ول ومىرگە كەلگەندە تۋعان اكە-شەشەسى ودان باس تارتىپ، بالالار ۇيىنە تاستاپ كەتتى. كەيىن ونى بالالار ۇيىنەن جاڭا اتا-اناسى اسىراپ الدى.

ول مەكتەپتە الىمجەتتىلىك كوردى. سول سەبەپتى ۋاقىتتى جالعىز وتكىزگەندى قۇپتايتىن. ءبىراق قورلاۋعا قاتتى ۇشىرعان سوڭ، باسقا مەكتەپكە اۋىسۋدى نەمەسە مۇلدە مەكتەپتە وقىماۋدى شەشتى. باقىتىنا قاراي، ول جاڭا اۋىسقان مەكتەبىنەن العاش كومپيۋتەرلەردى كورەدى. سول كەزدە ول 12 جاستا ەدى.

ول سوندا العاش كومپيۋتەرلىك ساباققا قاتىستى. ول وتە اقىلدى بالا ەدى، ءبىراق ەشقاشان مەكتەپ جۇيەسىن جاقسى كورمەدى. ءداستۇرلى ەمەس جولمەن ۇيرەنگەندى جاقسى كورەتىن ونىڭ مەكتەپتەگى GPA باعاسى 4 باللدان 2.65 بالل بولدى. سول بويىنشا ول جاقسى دا ەمەس، ناشار دا ەمەس، ورتاڭقول وقۋشى سانالدى.

ول مەكتەپ بىتىرگەن سوڭ، ريد كوللەدجىنە ءتۇستى. ءبىراق 6 ايدان كەيىن وقۋدان شىعىپ قالدى. دەگەنمەن وقۋدان شىعىپ قالسا دا، ءوزى قىزىققان ساباقتارعا بەيرەسمي تۇردە قاتىسىپ ءجۇردى. سول كەزدەر ونىڭ تەك قانا ءومىر ءسۇرۋ ءۇشىن جانتالاسىپ جۇرگەن كەزى ەدى. ونىڭ جاتاتىن جەردى دە جوق بولدى. سول سەبەپتى دوسىنىڭ بولمەسىندە جاتتى جانە بوساعان بوتەلكەلەردى 5 سەنتكە قايتارىپ، تاماق ساتىپ الاتىن.

سول جىلدار ونىڭ ومىرىندەگى ەڭ قيىن ۋاقىتتار بولدى. سودان كەيىن ءۇندىستانعا باردى. ءۇندىستانداعى ۋاقىت ونىڭ ءومىرىن وزگەرتۋگە كومەگىن تيگىزدى. سونداعى العان مەديتاسيا، جىگەر، رۋحى ونى كەيىن تاريحتاعى ەڭ ۇلى ادامداردىڭ ءبىرى ەتۋگە سەبەپشى بولدى.

ول دوسىمەن بىرگە گاراجدا وزدەرىنىڭ كومپانياسىن قۇردى. دوسى ەكەۋى قۇرعان كومپانيا 10 جىلدىڭ ىشىندە 2 ملرد دوللارلىق الىپ كومپانياعا اينالدى. ول كومپانيا Apple، كەيىپكەرىمىز ستيۆ دجوبس ەدى.

1984 جىلى Apple كومپانياسى ەڭ العاشقى كومپيۋتەرلەرىن جاريا ەتتى. الايدا ساتىلىم ويداعىداي بولماي شىقتى. سالدارىنان 1985 جىلى ستيۆ دجوبس ءوز كومپانياسىنان شىعارىلدى. "30 جاسىمدا مەن جۇمىستان شىعارىلدىم، دالادا قالدىم. مەن سول كەزگە دەيىن جاساعان ىسىمنەن، ەڭبەگىمنەن ءبىر-اق كۇندە ايىرىلدىم" دەگەن ەدى ستيۆ دجوبس. ونىڭ ايتۋىنشا، سول كەزدەگى جاعداي دجوبسقا وتە اۋىر تيگەن. ول ءۇمىتىن ۇزە باستادى.

ستيۆ دجوبس باسىنان نەبىر اۋىر جاعدايلار وتسە دە، ونى "جاسىرىلعان باقىت بولار" دەپ تۇسىنگەنىن ايتتى.

"العاشىندا مەن بىلمەدىم. ءبىراق كومپانيادان جۇمىستان شىعارىلۋ – مەنىڭ ومىرىمدە بولعان ەڭ كەرەمەت ءىس" دەگەن ول ەسكە الىپ. ستيۆ دجوبس Apple-دان شىعىپ قالعان سوڭ ءوزىنىڭ كرەاتيۆتى ءومىرى بولعانىن ايتتى.

سول ۋاقىتتاردا ول جاڭا كومپانيا قۇرعان جانە بەلگىلى دەڭگەيدە جەتىستىككە جەتكەن، دەگەنمەن قيىنشىلىقتار دا كەزىككەن. سول جىلدارى Microsoft كومپانياسىنىڭ دامۋىنا بايلانىستى Apple قيىنشىلىقتارعا ۇشىراپ، بانكروت بولۋعا جاقىندايدى. كومپانيا ستيۆ دجوبستى قايتا شاقىرادى. 1997 جىلى ول Apple-عا ورالدى.

ستيۆ دجوبستىڭ باستاۋىمەن كومپانيا زىمىرانداي كوتەرىلىپ دامىدى. ونىڭ ءبىر ۇلكەن سەبەبى ستيۆ دجوبس كاپيتاليزم رامكاسىنان شىعىپ ويلاي الاتىن: دجوبس ەڭ ماڭىزدى ءىس، نارىقتىق ەكونوميكاداعى پايدا ەمەس، قايتا، ساپا جانە كەمەلدىلىك دەپ سانايتىن. وزگەشە ۇستانىمىنا بايلانىستى تەك پايدانى كوزدەيتىن ينۆەستورلارمەن كەلىسپەي قالىپ ءجۇردى. سول سەبەپتى دە كومپانيادان شىعارىلعان-دى.

كەيىنىرەك Apple كومپانياسى تاريحتاعى ەڭ العاشقى تريلليون دوللارلىق كومپانياعا اينالدى. وكىنىشكە قاراي ستيۆ دجوبس 2011 جىلى ومىردەن وزدى. دەگەنمەن ونىڭ جەتىستىگى، ىستەرى، عيباراتتى سوزدەرى كەيىنگە قالدى.

ستيۆ دجوبس ادەتتەگى ستۋدەنت ەدى، ومىرىندە تالاي رەت ساتسىزدىككە ۇشىرادى، تالاي مارتە بەتى قايتارىلدى، جۇمىستان شىعارىلدى، ۇمىتسىزدەندى. ءبىراق ول العان بەتىنەن قايتپاي ەڭ سوڭىندا 21 عاسىرداعى ەڭ ۇلى ۆيزيونەرگە اينالدى.